Mingəçevir Turizm Kolleci publik hüquqi şəxsin təşkilatçılığı və Mingəçevir Regional Turizm İdarəsinin tərəfdaşlığı ilə “Konstitusiya və Suverenlik İli” və Ümummilli Lider Heydər Əliyevin anım günü münasibətilə “Dövlət suverenliyi və turizm: perspektivlər və çağırışlar” mövzusunda nəzəri konfrans keçirilib. Tədbirdən əvvəl Mingəçevir Turizm Kolleci və Mingəçevir Regional Turizm İdarəsinin əməkdaşları və tələbələr Ümummilli Liderin abidəsini ziyarət edərək, abidənin önünə gül dəstələri qoymuşlar. Konfransın rəsmi hissəsi Ulu Öndər Heydər Əliyevin və Vətən uğrunda şəhid olmuş qəhrəmanların əziz xatirəsinin bir dəqiqəlik sükutla yad edilməsi ilə başlayıb. Ardınca Azərbaycan Respublikasının Dövlət Himni səsləndirilib.

Konfransda ilk çıxış edən kollecin direktoru Kamal Əhmədov dövlət suverenliyinin qorunması və turizmin inkişaf strategiyaları arasındakı qarşılıqlı əlaqələrin əhəmiyyətini vurğulayıb. Daha sonra Mingəçevir Regional Turizm İdarəsinin rəisi Tural Kərimov mövzu ilə bağlı öz fikirlərini bildirib. Konfrans çərçivəsində müxtəlif məruzələr dinlənilib. Mingəçevir Dövlət Universitetinin müəllimi Əli Nadirov “Azərbaycan–Türkiyə strateji tərəfdaşlığının turizm sektoruna təsiri”, Mingəçevir Turizm Kollecinin Turizm fənn birliyinin sədri Samir Zamanov “Qlobal Onlayn Turizm Agentliklərinin Azərbaycan turizm siyasətinə təsiri”, kollecin turizm müəllimi Kənan Abbasov “Post-müharibə dövründə Qarabağda tarixi, arxeoloji və mədəni irsin bərpası”, River Side Hotelinin direktoru Elşən Muradov isə “Turizm mədəni irsin və milli dəyərlərin qorunması və təşviqi” adlı məruzələri ilə çıxış ediblər. Konfransın sonunda kollecin direktoru Kamal Əhmədov bütün iştirakçılara və dəvətli qonaqlara öz təşəkkürünü bildirib.