Heydər Əliyevin anadan olmasının 99-cu ildönümü münasibətilə mayın 10-da Mingəçevir Turizm Kollecində silsiləsi tədbirlər həyata keçirilib.
Müasir müstəqil Azərbaycan dövlətinin memarı və qurucusu, xalqımızın ümummilli lideri Heydər Əliyevin anadan olmasının 99-cu ildönümü münasibətilə mayın 10-da Mingəçevir Turizm Kollecində silsiləsi tədbirlər həyata keçirilib.
Tədbirdən öncə mərasim iştirakçıları Azərbaycanın müstəqilliyi və ərazi bütövlüyü uğrunda canlarını fəda etmiş bütün şəhidlərimizin müqəddəs və unudulmaz xatirəsini bir dəqiqəlik sükutla yad edib, qazilərə şəfa diləyiblər.
Tədbirdə çıxış edən kollecin tarix müəllimi Eldar Dərişov qəlbi daim vətən eşqi ilə döyünən, bütün varlığı ilə xalqına bağlı olan, istiqlal yolumuzu və istiqbalımızı nurlandıran, millətini zamanın sərt sınaqlarından yüksək məharətlə çıxaraq, hər bir çətin vəziyyətdən ən düzgün çıxış yolu tapan müdrik lider Heydər Əliyevin Azərbaycan tarixindəki və beynəlxalq arenadakı rolundan, o cümlədən demokratik, hüquqi dövlət quruculuğunda, ölkəmizin qüdrətlənməsində, xalqın rifahının yüksəldilməsində misilsiz xidmətlərindən və dünya siyasətinə verdiyi töhfələrdən danışıb.
Daha sonra tədbirdə çıxış edən kollecin ədəbiyyat müəllimi Kifayət Əliyeva dünya miqyaslı siyasi təfəkkürə, zəngin və qətiyyətli idarəçilik bacarığına, ən çətin vəziyyətlərdə belə tükənməz əzm və qüdrətə malik Ümummilli Lider Heydər Əliyevin xalqımız qarşısında misilsiz tarixi xidmətlərindən, şərəfli ömür yolundan və məharətli dövlətçilik təcrübəsindən bəhs etmiş, görkəmli dövlət xadiminin müəyyən etdiyi siyasi kursu uğurla davam etdirən Azərbaycan Respublikasının Prezidenti cənab İlham Əliyevin rəhbərliyi ilə üçrəngli bayrağımızın ən yüksək zirvələrdə qürurla dalğalanmasını diqqətə çatdırıb.
Kifayət Əliyeva çıxışının sonunda qeyd edib ki, dəyərli və mənalı ömrünü Vətəninə həsr edərək, milləti qarşısında misilsiz xidmətlər göstərməklə Azərbaycan xalqının Ümummilli Lideri adını qazanmış dünya siyasətinin parlaq siması ulu öndər Heydər Əliyev tarixdə və azərbaycanlıların qəlbində əbədi olaraq qalacaq, bu nəhəng tarixi şəxsiyyətin əziz və unudulmaz xatirəsi hər zaman böyük ehtiramla yad ediləcək.
Tədbir Bakı şəhəri Gənclərin Respublika Bədii Yaradıcılıq Evində keçirilən Ulu öndər Heydər Əliyevin 99-cu ildönümünə həsr olunmuş “Sən elə bir zirvəsən” adlı Respublika ifa müsabiqəsində III yerə layiq görülmüş Mingəçevir Turizm Kollecinin III kurs tələbəsi Hidayətova Rəvanə Fuad qızı tərəfindən səsləndirilən şeir ilə başa çatıb.
Həmçinin 2022-ci ilin 8-10 may tarixlərində Mingəçevir Turizm Kollecinin və Mingəçevir Şəhər Təhsil Şöbəsinin təşkilatçılığı ilə şəhərin beş məktəbinin şagirdləri üçün Ulu öndər Heydər Əliyevin anadan olmasının 99-cu il dönümünə həsr edilmiş “Ulu öndər zirvəsi” adlı “Nə? Harada? Nə zaman? İntellektual oyunları keçirilib. Yarış başlamadan öncə müasir Azərbaycanın memarı Heydər Əliyevin ölkəmizin müstəqilliyi və tərəqqisi naminə həyata keçirdiyi uzaqgörən siyasətindən və titanik fəaliyyətindən bəhs edilib, Ümummilli Liderin təhsilə, uşaqların və gənclərin hərtərəfli inkişafına göstərdiyi diqqət və qayğıdan danışılıb, əbədiyaşar liderin gənclərlə bağlı tövsiyələri xatırlanıb.
Qeyd edək ki, Mingəçevir Turizm Kollecində Ulu Öndərə həsr olunan müxtəlif formatlı tədbirlərin keçirilməsinə xüsusi diqqət yetirilir. Dahi şəxsiyyətin zəngin irsinin araşdırılması və tələbə gənclər arasında təbliği kollecdə vətəninə, dövlətinə və xalqına bağlı, layiqli, vətənpərvər mütəxəssislərin yetişdirilməsi işinə böyük töhfə verir.
