Azərbaycan ordusunun parlaq tarixi qələbələrindən biri olan şanlı Aprel döyüşlərindən doqquz il ötür. 2016-cı il aprelin 2-də Ermənistan silahlı qüvvələrinin qoşunların təmas xəttində ardıcıl təxribatlarına cavab olaraq keçirilmiş əks əməliyyat zamanı qazanılmış qələbə ordumuzun gücünü, xalqımızın yenilməz ruhunu bütün dünyaya göstərdi. Azərbaycan ordusu sürətli əks-hücum əməliyyatı ilə düşməni ağır məğlubiyyətə uğradaraq Füzuli, Cəbrayıl və Ağdərə rayonlarının işğal altındakı ərazilərinin 2000 hektardan çox hissəsini, strateji əhəmiyyətli yüksəklikləri azad etdi. Həmçinin minlərlə hektar ərazi Azərbaycan ordusunun tam nəzarətinə keçdi. Azərbaycan Ordusu dördgünlük Aprel döyüşləri ilə uzun illərdən sonra xalqımıza qələbə sevinci yaşatdı.

Aprel döyüşlərinin ən böyük tarixi əhəmiyyəti bu qələbə sayəsində Böyük Qayıdış prosesinə start verilməsi oldu. Lələtəpə yüksəkliyinin azad edilməsi nəticəsində Cəbrayıl rayonunun Cocuq Mərcanlı kəndində mülki əhalinin yaşayışı üçün təhlükə təmamilə aradan qaldırıldı. Bu kəndin əhalisinin 23 illik fasilədən sonra doğma torpaqlarına qayıtması işğal altındakı digər ərazilərimizin də tezliklə azad olunmasına xalqımızda dərin inam yaratdı. Prezident Ali Baş Komandan cənab İlham Əliyevin Aprel döyüşlərinin əhəmiyyəti haqqında dediyi sözlər bu qələbənin xalqımız üçün əhəmiyyətini açıq şəkildə ifadə edir “Aprel döyüşləri hərbi dərsliklərə salınmalıdır. Həm peşəkarlıq həm də vətənpərvərlik ruhu baxımından Aprel döyüşləri bir daha sübut etdi ki, Azərbaycan xalqı qəhrəman xalqdır. Bir daha göstərdi ki, biz bu vəziyyətlə barışmayacağıq.” Aprel döyüşlərində qazanılan tarixi qələbə sonrakı qələbələr üçün zəmin yaratdı. Azərbaycan Ordusu 44 günlük Vətən müharibəsində tarixi qələbə qazanaraq ölkəmizin ərazi bütövlüyünün bərpasına nail olmaqla yeni zəfər salnaməsi yaratdı. Azad edilmiş torpaqlarda qaldırılmış Azərbaycan bayraqları 2020-ci il Dekabrın 10-da Bakının Azadlıq meydanında Vətən müharibəsində qələbəyə həsr olunmuş Zəfər paradında nümayiş etdirildi. Azərbaycanın ərazi bütövlüyü və tarixi ədalət bərpa olundu. Bu qələbə son 200 illik tariximizin ən böyük zəfəridir. Bu qələbəyə gedən yolun tarixini və bu zəfər tarixini qanları ilə yazan şəhidlərimizin əziz xatirələrini gənclərin yaddaşında möhkəmləndirmək, və gənc nəsldə vətənə sevgi, məhəbbət hisslərini aşılamaq məqsədilə Mingəçevir Turizm Kollecində vətənpərvərlik mövzusunda tədbirlər daim diqqət mərkəzində saxlanılır. Bu məqsədlə 4 Aprel 2025-ci il tarixində birinci dərslər Aprel Döyüşlərinə həsr olunub. Dərslərdə Qarabağ döyüşlərində canlarını qurban vermiş şəhidlərimizin əziz xatirəsi bir dəqiqəlik sükutla yad edilib. Aprel döyüşlərinə həsr olunmuş videoçarx nümayiş etdirilib, maarifləndirici söhbət aparılıb.

Mingəçevir Turizm Kollecinin kollektivi olaraq Azərbaycan Respublikasının ərazi bütövlüyü və suverenliyi uğrunda canlarını qurban vermiş şəhidlərimizin əziz xatirəsini dərin hörmət və ehtiramla yad edirik. Şəhidlərimizə rəhmət, qazilərimizə can sağlığı diləyirik.

Hörmətlə : Kollec rəhbərliyi