Mingəçevir Turizm Kollecində “İnsan Hüquqları Aylığı” çərçivəsində 22 may 2025-ci il tarixində “Gənclərin iş dünyasında ilk addımı: Əmək hüquqları” mövzusunda tələbələrlə dəyirmi masa keçirilib. Tədbirin məqsədi gənclərin əmək qanunvericiliyi sahəsində maarifləndirilməsi, onların hüquq və vəzifələri barədə məlumatlandırılması olub.
Tədbirin əvvəlində Ulu Öndər Heydər Əliyevin və Vətən uğrunda canından keçmiş şəhidlərimizin əziz xatirəsi bir dəqiqəlik sükutla yad edilib və Azərbaycan Respublikasının Dövlət Himni səsləndirilib.
İlk olaraq çıxış edən kollecin hüquq məsləhətçisi Günel Musayeva gənclərin hüquqi biliklərə yiyələnməsinin əmək münasibətlərində qarşılaşa biləcəkləri çətinliklərin həllində mühüm rol oynadığını vurğulayıb. O, eyni zamanda əmək müqaviləsinin bağlanması, iş şəraitinin qanunvericiliyə uyğun olması və işəgötürənlə işçi arasında münasibətlərin tənzimlənməsi barədə məlumat verib.
Daha sonra Mingəçevir şəhər Vəkil Bürosunun vəkili Rafiq Yusifov çıxış edərək əmək hüquqlarının pozulması hallarına qarşı hüquqi müdafiə vasitələrindən danışıb. O, həmçinin iş yerində hüquqların qorunması və məhkəməyə müraciət yolları haqqında praktiki tövsiyələr verib.
Ardınca vəkil Anar Mövsümov çıxış edərək gənc mütəxəssislərin əmək bazarına daxil olarkən diqqət etməli olduqları hüquqi nüanslardan danışıb.
Tədbirdə həmçinin Mingəçevir Turizm Kollecinin hüquq fənn müəllimi Qənimət Hüseynov, Həmkarlar İttifaqı Komitəsinin sədri Canpolad Həmidov və İnsan Resurslarının İdarə Olunması Şöbəsinin müdiri Vüqar Bayramov da çıxış edərək, gənclərin əmək münasibətlərində daha hazırlıqlı və məlumatlı olmalarının önəmini vurğulayıblar. Onlar tələbələrin gələcək peşə fəaliyyətində hüquq biliklərinin praktiki əhəmiyyətindən bəhs ediblər.
Dəyirmi masa qarşılıqlı müzakirələr fonunda davam edib.