Mingəçevir Turizm Kollecində 2025-ci ildə təhsillərini başa vuran tələbələrin “Məzun günü” tədbiri keçirilib. Tədbirdə kollecin müəllim və tələbə kollektivi iştirak edib.

Tədbir Ümummilli Lider Heydər Əliyevin və respublikamızın ərazi bütövlüyü, suverenliyi uğrunda canlarını fəda etmiş şəhidlərimizin əziz xatirəsinin bir dəqiqəlik sükutla yad edilməsi ilə başlayıb. Ardınca Azərbaycan Respublikasının Dövlət Himni səsləndirilib.

Mingəçevir Turizm Kollecinin direktoru Kamal Əhmədov çıxış edərək məzunları təbrik edib, onlara gələcək həyat və fəaliyyətlərində uğurlar arzulayıb. O, tələbələrin qazandıqları bilik və bacarıqların gələcək peşə fəaliyyətlərində mühüm rol oynayacağına əminliyini bildirib. Kamal Əhmədov, həmçinin tələbələrin formalaşmasında əməyi olan müəllim heyətinə də təşəkkürünü bildirərək, onların əziyyətini yüksək qiymətləndirib.

Təhsil proqramını uğurla başa vuran, dərslərində yüksək nəticələr göstərən, bilik yarışlarında fəal iştirak edən və bədii özfəaliyyət tədbirlərində aktivliyi ilə seçilən tələbələr fəxri fərmanla təltif ediliblər.

Kollecin direktoru həmçinin, inzibati heyət arasında aparılan monitorinq və qiymətləndirmə nəticəsində əldə etdikləri yüksək nailiyyətlərə görə Samirə Abbasova və Xəyalə Əlişovanı fəxri fərmanla, kollecin ictimai-sosial fəaliyyətində fəal iştirakına görə isə Nuridə Zülfüqarovanı təşəkkürnamə ilə təltif edib.

Tədbirin rəsmi hissəsi yekunlaşdıqdan sonra tələbələrin ifasında səsləndirilən musiqilər və təqdim olunan milli rəqslər tədbir iştirakçıları tərəfindən böyük maraqla qarşılanıb.

Tədbirin sonunda Şəhid leytenant Kənan Abdullayevin anası, kollecin dəyərli əməkdaşı Azadə xanım məzun tortunu kəsərək tələbələri səmimi qəlbdən təbrik edib və onlara gələcək həyatlarında uğurlar arzulayıb.