Mingəçevir Turizm Kolleci publik hüquqi şəxsi ilə “Qafqaz-Qəbələ” MMC, eləcə də “Marxal” Müalicə-İstirahət Kompleksi arasında əməkdaşlıq haqqında Memorandum imzalanıb. Sözügedən Memorandum təhsil prosesi ilə praktiki təcrübə arasında qarşılıqlı əlaqələrin gücləndirilməsinə və əmək bazarının tələblərinə uyğun kadr hazırlığının təmin edilməsinə yönəlib.

Memorandumun müddəalarına əsasən, kollecin tələbələrinin müəssisələrdə könüllü fəaliyyətdə və istehsalat təcrübəsində iştirakı, məzunların mövcud vakansiyalar barədə mütəmadi şəkildə məlumatlandırılması, habelə onların peşəkar karyera inkişafına dəstək göstərilməsi nəzərdə tutulur. Bununla yanaşı, tərəfdaş müəssisələrin ixtisaslı əməkdaşlarının tədris prosesinə cəlb edilməsi, birgə layihələrin icrası, elmi-praktiki təlimlərin, seminarların və ustad dərslərin həyata keçirilməsi planlaşdırılır. Qeyd olunan əməkdaşlıq mexanizmləri turizm sahəsində insan kapitalının inkişafına, tələbələrin nəzəri biliklərinin praktik bacarıqlarla zənginləşdirilməsinə, eləcə də təhsil müəssisələri ilə özəl sektor arasında institusional əməkdaşlığın genişləndirilməsinə mühüm töhfə verəcəkdir.