Mingəçevir Turizm Kollecində tələbələrin antinarkotik dünyagörüşünün formalaşdırılması məqsədilə “Biz narkotikə yox deyirik” mövzusunda maarifləndirici tədbir keçirilib. Tədbirdə çıxış edən kollecin Baş hüquqşünası Anar Yusifov bildirib ki, narkotik asılılığın qurbanları daha çox yeniyetmələr və gənclər olur. Narkotika aludəçiliyi həm gənc insanın özü, həm də ailəsi və yaxınları üçün faciəyə çevrilir. Narkotiklərdən asılılıq ümumi fiziki xəsarətlərə və sağlamlığın ciddi ağırlaşmalarına səbəb olur.

Daha sonra çıxışları davam etdirən Mingəçevir Şəhər Polis Şöbəsinin Narkotiklə Mübarizə Qrupunun baş əməliyyat müvəkkili polis mayoru Emir Cavadov bildirib ki, narkotika təhlükəsi artdıqca onunla mübarizə zərurəti daha da aktuallaşır. Narkotiklərdən sui istifadə və onların qanunsuz dövriyyəsi son onilliklərdə daha çox qlobal miqyas almışdır, və cəmiyyətdəki sosial – psixoloji mühitə, iqtisadiyyata və qanunun aliliyinə mənfi təsir göstərir. Narkotiklərlə mübarizə istiqamətində Azərbaycan Dövləti bütün sahələrdə geniş miqyaslı tədbirlər həyata keçirir.

Sonda narkotikin zərərləri və insan orqanizmində törətdiyi fəsadlar haqqında videoçarx nümayiş etdirilib, tələbələrin fikirləri dinlənilib.