Mingəçevir Turizm Kollecində “20 Yanvar həqiqətlərinin dünya ictimaiyyətinə çatdırılmasında Ümummilli lider Heydər Əliyevin rolu” mövzusunda tədbir həyata keçirilmişdir.

       Mingəçevir Turizm Kollecinin kollektivi və tələbələri Mingəçevir şəhər Şəhidlər Xiyabanında yerləşən “20 Yanvar abidəsi”ni ziyarət edərək abidənin və şəhidlərin məzarı üzərinə güllər düzüblər. Kollektiv şəhidlərimizin məzarı önündə hörmət duruşu nümayiş edib, şəhidlərimizin əziz ruhuna etiramlarını ifadə ediblər.

      Günün ikinci yarısında 20 Yanvar faciəsinin 33-cü ildönümünə həsr olunmuş anım günü münasibəti ilə Mingəçevir Turizm Kollecində “20 yanvar həqiqətlərinin dünya ictimaiyyətinə çatdırılmasında Ümummilli lider Heydər Əliyevin rolu” mövzusunda dəyirmi masa keçirilib. Dəyirmi masanı giriş sözü ilə kollecin direktoru Kamal Əhmədov açıq elan edib və şəhidlərimizin ruhu bir dəqiqəlik sükutla yad edilib. Kamal Əhmədov 20 Yanvar hadisəsinin səbəblərini, nəticələrini izah edərək, onu həm hüzn, həm də qəhrəmanlıq səhifəsi kimi səciyyələndirib. Bildirib ki, həmin hadisəyə ilk qiyməti Ümummilli lider Heydər Əliyev Moskvada keçirdiyi mətbuat konfransında vermişdir. Bu gün Azərbaycan respublikasının prezidenti cənab İlham Əliyevin rəhbərliyi ilə 1990-cı il 20 Yanvar hadisələri dünyaya bəyan edilir və 20 Yanvar şəhidlərinin ailələrinə xüsusi qayğı göstərilməsi, onların problemlərinin vaxtlı-vaxtında həll olunması Ümummili lider Heydər Əliyev siyasətinin əmin əllərdə olduğunu göstərir.

      Dəyirmi masanın gündəliyinə uyğun olaraq tədris işləri üzrə direktor müavini Aynurə Abbasova “Tariximizin Qanlı və Şanlı səhifələri” mövzusu ilə çıxışında qeyd edib ki, 20 yanvarda törədilən qətl hadisələri azadlıqsevər Azərbaycan xalqının iradəsini qıra bilməmiş, xalqın azadlıq, müstəqillik uğrunda mücadiləsini daha da gücləndirmişdir. Kollecin tədris şöbəsinin müdiri Ceyhun Abdullayev “20 Yanvar hadisələrinin müstəqil Azərbaycanda hüquqi-siyasi qiymətləndirilməsi” mövzusunda çıxış edərək bildirib ki, sovet ordusu tərəfindən 1990-cı il 20 Yanvar hadisələrinin törədilməsində əsas məqsəd Azərbaycanda xalq hərəkatına zərbə vurmaq, mövcud olan rejimin dağılmasına yol verməmək və istiqlaliyyət uğrunda mübarizə aparan qüvvələri məhv etmək olmuşdur. 38 saylı YAP ərazi təşkilatının sədr müavini Eldar Dərişov “Azadlığa aparan yol”, Azərbaycan dili və ədəbiyyat müəllimi Aygün Əzizova “Ümummilli lider Heyder Əliyevin 20 Yanvar hadisələri ilə bağlı Sovet rəhbərliyinə etiraz bəyanatı” mövzuları ilə öz çıxışlarında 20 Yanvar hadisəsinin müxtəlif səbəbləri haqqında danışaraq, öz dəyərli fikirlərini auditoriya ilə bölüşüblər. Otuz üç il əvvəl Azərbaycan xalqının milli azadlıq mübarizəsini boğmaq məqsədilə dinc əhalimizə qarşı törədilmiş amansız və dəhşətli qətliamın müxtəlif aspektlərindən bəhs edən çıxışlardan sonra mövzu ətrafında müzakirələr aparılıb, suallar cavablandırılıb. Tədbiri yekun sözü ilə bitirən kollecin direktoru Kamal Əhmədov 1990-cı ilin 20 yanvar tarixi Azərbaycanın azadlığına, azərbaycançılıq məfkurəsinin bir ideologiya kimi formalaşmasına yönəlmiş ən ciddi aksiya və Azərbaycan xalqının öz müstəqilliyinə qovuşmaq cəhdi olduğunu bildirərək qeyd edib: “Tarixlər boyu Azərbaycanın azadlığı, bütövlüyü, müstəqilliyi uğrunda canlarından keçmiş qəhrəmanlar olub və bu gün də Ali Baş Komandan İlham Əliyev başda olmaqla istər sərhəddə düşmənlə üzbəüz dayanan əsgərlərimiz, istərsədə üç rəngli Azərbaycan bayrağını daim zirvələrdə tutan pedaqoqlar, idmançılar, siyasətçilər, iqtisadçılar, turizmçilər və digər peşə sahibləri bu missiyanı davam etdirir” deyərək yekun nitqini bitirib.