Narkomaniya əsrin bəlasıdır!
24 iyun 2022-ci il tarixində Mingəçevir Turizm Kolleci və “İşıqlı Gələcək” Gənclər İctimai Birliyinin birgə təşəbbüsü ilə Mingəçevir Gənclər Evi-sosial xidmət müəsisəsində “Narkomaniya əsrin bəlasıdır” adlı maarifləndirici görüş keçirilib.
“26 iyun – narkomaniya və narkobiznesə qarşı Beynəlxalq Mübarizə Günü” məqsədilə həyata keçirilən görüşdə əsrin bəlası olan narkomaniyanın insan sağlamlığına vurduğu zərərlər haqqında tələbələrə maarifləndirilmə aparılıb. Bu məqsədlə çıxış edən Mingəçevir Turizm Kollecinin mədəni və kütləvi tədbirlər üzrə təşkilatçısı Ş.Mirzalıyev öz nitqində bəşəriyyətin ən ağrılı problemlərindən olan narkomaniyanın, dilindən, dinindən, irqindən, sosial vəziyyətindən asılı olmayaraq hamı üçün eyni dərəcədə təhlükə mənbəyi olduğunu diqqətə çatdırıb. O bildirib ki, cəmiyyətin inkişafını ləngidən, insanların sağlamlığına və mənəviyyatına sarsıdıcı zərbə vuran narkomaniyaya qarşı mübarizənin gücləndirilməsi beynəlxalq və ölkə səviyyəsində kompleks tədbirlər əsasında həyata keçirilir və ölkə rəhbərliyi tərəfindən daim diqqət mərkəzindədir. Sonda görüş iştirakçılarına məlumatlandırma bukletləri paylanılıb.
Qeyd: Narkotik vasitələrin qanunsuz dövriyyəsi və istifadəçiləri barədə məlumatı olan şəxslərdən 802 qaynar xəttinə müraciət etməyiniz xahiş olunur. Müraciət edən şəxsin kimliyi anonim olaraq saxlanılır.