18 noyabr 2025-ci il tarixində Mingəçevir Turizm Kollecinin tələbələri ümummilli lider Heydər Əliyevin zəngin irsinin daha dərindən öyrənilməsi məqsədilə Mingəçevir Şəhər Heydər Əliyev Mərkəzini ziyarət ediblər. “Konstitusiya və suverenlik ili” ilə bağlı tədbirlər planı çərçivəsində həyata keçirilən ziyarət müddətində tələbələrə Ulu Öndərin həyat və fəaliyyətini əks etdirən eksponatlar, sənədlər, fotoşəkillər və video materiallar haqqında geniş məlumat verilib. Mərkəzin bələdçisi tələbələrlə interaktiv söhbət apararaq Heydər Əliyevin dövlətçilik ənənələrinin formalaşmasında, ölkənin siyasi, iqtisadi və mədəni inkişafında oynadığı müstəsna roldan bəhs edib. Tələbələr həmçinin Azərbaycanın müasir inkişaf yolunun məhz Ulu Öndərin müəyyən etdiyi strategiya üzərində qurulduğunu xüsusi maraqla dinləyiblər. Ziyarət çərçivəsində tələbələr Heydər Əliyevin uşaqlıq illəri, təhsil həyatı, dövlət təhlükəsizliyi orqanlarındakı fəaliyyəti və ölkəmizin beynəlxalq aləmdə tanıdılması istiqamətində gördüyü işlərlə bağlı müxtəlif ekspozisiyalarla tanış olublar. Sonda tələbələr ziyarətlə bağlı xoş təəssüratlarını bölüşüblər.