Mingəçevir Turizm Kollecinin “Turizm fənn birləşmə komissiyası”nın müəllimi Aydın Rəhimovun “Turist davranışı və psixologiyası” fənnindən Turist destinasiyasının imici mövzusunda RİST-10 qrupu ilə açıq dərsi həyata keçirilib. 

Açıq dərsdə turizm destinasiya anlayışı, onun növləri və xüsusiyyətləri, destinasiyanın imici, bu imicə təsir edən faktorlar, həmçinin imicin turistlərin destinasiya seçminə təsiri haqqında məlumatlar təqdim olunub. Dərs zamanı interaktiv metodlardan geniş istifadə olunub. Tədris prosesi komandalararası  sorğu və sual-cavab sessiyaları, eləcə də internet platformaları üzərindən kuiz çalışmaları ilə zənginləşdirilib. 

Dərsin vizual və interaktiv keçirilməsi üçün slaydlar, müxtəlif təqdimat vasitələri və digər multimedia materiallarından istifadə olunub. Tədris zamanı turizm destinasiya anlayışına dair YUNESKO-nun “Qeyri-Maddi Mədəni İrs Siyahısına” daxil edilmiş mədəniyyət nümunəllərindən misallar verilib. 

Tədbir çərçivəsində tələbələr mövzuya dair hazırladıqları layihə işlərini və apardıqları araşdırma-tədqiqat nəticələrini təqdim ediblər. Təqdimatlar zamanı tələbələr arasında aktiv müzakirələr aparılıb və mövzunun daha yaxşı mənimsənilməsi üçün əyani nümunələrdən istifadə edilib.

Dərsin sonunda tələbələr arasında təşkil olunan müsabiqə çərçivəsində qalib komandalar müəyyən edilib. Qaliblər xüsusi olaraq təltif olunub. Açıq dərs yekunlaşdıqdan sonra tələbələrə mövzu ilə bağlı genişləndirici və yaradıcılq əsaslı ev tapşırıqları verilib. Bu yanaşma dərsin daha effektiv və öyrədici olmasına şərait yaradıb.