Mingəçevir Turizm Kollecində Zəfər gününə həsr olunmuş “8 Noyabr – Tarixi Zəfər Günümüz” adlı tədbir keçirilib. Tədbirdə Azərbaycan Respublikası Dövlət Turizm Agentliyinin Aparat rəhbərinin müavini Cəlil Məlikov, Şəhid valideynləri, qazilər və Mingəçevir Turizm Kollecinin müəllim və tələbə heyəti iştirak edib. Tədbirdə Ümummilli lider Heydər Əliyevin, birinci və ikinci Qarabağ müharibəsində və antiterror əməliyyatlarında canlarını qurban vermiş Şəhidlərimizin əziz xatirəsi bir dəqiqəlik sükutla yad edilib, Azərbaycan Respublikasının dövlət himni səsləndirilib. Tədbiri giriş sözü ilə açan Mingəçevir Turizm Kollecinin direktoru Kamal Əhmədov çıxışında bildirib ki, 2020 – ci ilin 8 noyabr tarixi-Şuşanın işğaldan azad edildiyi gün bütün Azərbaycan xalqı üçün Zəfər günü kimi yadda qaldı. 44 günlük haqq savaşımız Azərbaycan tarixinə qızıl hərflərlə əbədi yazıldı. Bu qələbəni Ali Baş Komandanın qətiyyəti, siyasi iradəsi, müzəffər ordumuzun şücaəti, qəhrəmanlığı, qorxmaz cəsur əsgərlərimizin canı, müqəddəs, ölməz şəhidlərimizin qanı, xalqımızın birliyi hesabına qazandıq. Daha sonra Azərbaycan Respublikası Dövlət Turizm Agentliyinin Aparat rəhbərinin müavini Cəlil Məlikov çıxışında 8 Noyabr tarixinin Zəfər günü kimi qeyd edilməsindən qürur duyduğunu, eyni zamanda bu qüruru bizə yaşatdığı üçün əbədiyaşar şəhidlərimizə və öz sağlamlıqlarını torpaqlarımızın bütövlüyü və suverenliyi uğrunda qurban vermiş qazilərimizə borclu olduğumuzu bildirib. Hərbçilərimizin cəsarətindən, şücaətindən və Ali Baş Komandan, Prezident İlham Əliyevin Zəfər səlnaməsindən bəhs edib. Tədbir Şəhid valideynlərinin, qazilərin, Mingəçevir Turizm Kollecinin müharibə iştirakçısı əməkdaşlarının çıxışları ilə davam edib.

Tədbirdən sonra Cəlil Məlikov və Mingəçevir Turizm Kollecinin kollektivi Mingəçevir şəhər Şəhidlər xiyabanını ziyarət ediblər.