Mingəçevir Turizm Kollecində tələbələrin ixtisasına müvafiq bilik və bacarıqlarının, vərdiş və peşə dəyərlərinin inkişaf etdirilməsi istiqamətində ustad dərsləri davam edir. “Daxili turizmin inkişaf perspektivləri və sərgilər” mövzusunda ustad dərsində Mingəçevir Gənclər Evi Sosial Xidmət Müəssisəsinin direktoru Tural Kərimov tələbələrə daxili turizmin inkişaf perspektivləri haqqında məlumat verməklə yanaşı, Azərbaycanda daxili turizmin inkişafının SWOT / GZİT təhlilini aparıb. Daha sonra komanda işi həyata keçirilib, Qruplar ölkəmizin müxtəlif bölgələrinin turizm imkanlarını təhlil ediblər. Turizm bölgələrindəki mövcud vəziyyət, maddi-texniki infrastruktur, turizmin inkişafına maneə törədən problemlər və problemlərdən çıxış yolları müzakirə edilib. Aktiv olan tələbələr Gənclər Evinin Lənkəran-Astara və Quba-Qusar istiqamətlərində təşkil edəcəyi turlarda iştirak haqqı qazanıblar .