Şanlı Azərbaycan Ordusu 44 günlük “Vətən Müharibəsi “ndə öz gücünü bütün dünyaya göstərdi. Milli mənəvi birliyimiz Vətən oğullarının doğma el obaya sədaqəti, mərdliyi və mətinliyi 44 günlük müharibədə özünü daha bariz şəkildə göstərdi. Mingəçevir Turizm Kollecinin 9 nəfər tələbəsi Vətən Müharibəsində, 3 tələbəsi isə vətənimizin suverenliyi uğrunda antiterror əməliyyatlarında şəhid olmuşdur. Belə qəhrəman oğullardan biri də Vətənini sevən, işğal altında olan torpaqlarımızı azad etmək hissi ilə hər an Ali Baş Komandanın əmrini gözləyən, o gün gəldiyində könüllü silaha sarılan Fuad Şöhrət oğlu Xankişiyevdir.

Mingəçevir Turizm Kollecində Fuad Xankişiyevin şərəfli həyat və döyüş yolundan bəhs edən “Mən gedirəm” adlı kitabın təqdimatı keçirilib. Tədbirdə şəhid anaları, şəhidin döyüş yoldaşları, tələbə yoldaşları, kollecin müəllim və tələbə heyəti iştirak edib.

Tədbirin başlanğıcında Vətənin azadlığı və suverenliyi uğrunda canlarından keçmiş bütün şəhidlərin və Ümummilli lider Heydər Əliyevin əziz xatirəsi bir dəqiqəlik sükutla yad edilib. Azərbaycan Respublikasının dövlət himni səsləndirilib. Tədbiri giriş sözü ilə açan kollecin direktoru Kamal Əhmədov Fuad Xankişiyevin qısa ömründə qazandığı nailiyyətlərdən danışıb, xüsusilə çatdığı şəhidlik mərtəbəsinin ali və müqəddəs bir məqam olduğunu vurğulayıb. Daha sonra şəhid Fuad Xankişiyevin anası Saqibət Xankişiyeva övladı ilə bağlı xatirələrini bölüşüb və kitabın necə ərsəyə gəlməsi haqqında məlumat verib. Tədbirin gedişatında Fuad Xankişiyevin həyat yolundan bəhs edən videoçarx nümayiş etdirildikdən sonra döyüş yoldaşları və müəllimləri Fuadın sağlığında necə qəhrəman ruhlu, vətənini sevən , qorxmaz və şücaətli olmasından danışıb. Kitabın təqdimatından sonra kollecin akt zalında tələbələr və tədbir iştirakçıları Fuad Xankişiyevin 24 illik qısa həyat yolundan və qəhrəmanlıqla keçən döyüş yolundan bəhs edən, “Şərəfli yol” adlı qısa filmə tamaşa ediblər.