Mingəçevir Turizm Kollecində dəyirmi masa: “Əsrin müqaviləsi” tarixi Zəfərimizə gedən yolun başlanğıcıdır.
Mingəçevir Turizm Kollecində dəyirmi masa: “Əsrin müqaviləsi” tarixi Zəfərimizə gedən yolun başlanğıcıdır.
Mingəçevir Turizm Kollecinin və YAP Mingəçevir şəhər təşkilatının birgə hazırladıqları tədbir Ulu Öndər Heydər Əliyevin və torpaqlarımızın azadlığı uğrunda şəhid olmuş Vətən övladlarının xatirəsinin bir dəqiqəlik sükutla yad edilməsi ilə başlayıb.
Daha sonra Mingəçevir Turizm Kollecinin Direktoru Kamal Əhmədov giriş sözü ilə çıxışında bildirib ki, 1994-cü il sentyabrın 24-də imzalanan “Əsrin müqaviləsi” ilə müstəqil dövlətimizin neft strategiyası və doktrinasının əsası qoyuldu və bu qlobal layihə Azərbaycanın suveren dövlət kimi öz təbii sərvətlərinə sahib çıxmaq, milli mənafelərini, iqtisadi və strateji maraqlarını müdafiə etmək əzmini bütün dünyaya göstərdi, dövlət müstəqilliyinin mühüm təminatına çevrildi.
Yeni Azərbaycan Partiyası şəhər təşkilatının sədri Bəxtiyar Mustafayev və digər çıxış edənlər böyük siyasi xadim Heydər Əliyevin balanslaşdırılmış siyasəti nəticəsində 1994-cü il sentyabrın 20-də gerçəkləşmiş “Əsrin müqaviləsi”nin imzalanmasında dünyanın ən məşhur neft şirkətlərinin iştirak etməsindən, “Yeni neft strategiyası” və doktrinasının əsasının qoyulmasından, bu müqavilədən sonra Azərbaycanda sabitlik və təhlükəsizliyin təmin edilməsinin regional deyil, qlobal bir məsələyə çevrilməsindən, Azərbaycanın iqtisadi potensialının ən vacib komponenti olan neft amilinin düzgün idarə edilməsinin 44 günlük Vətən müharibəsində Qələbənin qazanılmasına təsirindən bəhs ediblər.
Mingəçevir Turizm Kollecinin müəllimi Xudiyev İqbal “İlham Əliyev: Neft kapitalının insan kapitalına çevirək”, Ümumtəhsil fənlər birliyinin sədri Nuridə Zülfüqarova “Dövlət Neft Fondunun Azərbaycan gənclərinin xaricdə təhsilində rolu”, MTK-nın müəllimi Hüseynov Xeyrəddin “Neft sənayesi Azərbaycan iqtisadiyyatının onurğa sütunu kimi” mövzularında ümumi olaraq çıxışçılar tərəfindən bildirilib ki, Ulu Öndər Heydər Əliyevin siyasi-iqtisadi kursuna sadiq qalan Prezident İlham Əliyev bu yolla müstəqilliyimizi daha da möhkəmləndirir, Azərbaycanı güclü iqtisadiyyata malik qüdrətli ölkəyə çevirir. Vətən müharibəsində qazanılmış şanlı Qələbə məhz bu uğurlu siyasətin bariz nümunəsidir.
