Mingəçevir Turizm Kollecində 7 mart 2025-ci il tarixində Azərbaycan Respublikası Prezidenti cənab İlham Əliyevin “Azərbaycan dilinin saflığının qorunması və dövlət dilindən istifadənin daha da təkmilləşdirilməsi ilə bağlı tədbirlər haqqında” Fərmanına uyğun olaraq “Ana dilimizi sevək, sevdirək” adlı tədbir keçirilib. Tədbirdə kollecin Azərbaycan dili müəllimi Aybəniz Əliyeva çıxış edərək keçirilən tədbirin çox vacib mövzuya həsr olunduğunu və qloballaşan dünyamızda doğma dilimizin qorunub saxlanmasının qarşımızda duran ən vacib məsələlərdən biri olduğunu bildirib. Doğma dildə düzgün yazı və danışıq vərdişlərinin inkişafı istiqamətləri haqqında məlumat verib.
Daha sonra tədbir kollecin Azərbaycan dili və ədəbiyyat müəllimləri Zeynəb Xəlilovanın “Görkəmli şəxsiyyətlərimizin dilimizə münasibəti” və Ülviyyə Məmmədovanın “Azərbaycan dilinin saflığının qorunması əsas istiqamət kimi” adlı məruzələri ilə davam edib.Tədbirdə həmçinin kollecin tələbələri Nuranə Abbasova, Kəmalə Tanrıverdili, Nərminə Pənahova və Aydan Musayeva məruzə ilə çıxış ediblər.
Tədbirin sonunda tələbələrin ifasında doğma ana dilimizə həsr olunmuş şeirlər səsləndirilib.