Mingəçevir Turizm Kolleci publik hüquqi şəxsi ilə Gəncə Regional Turizm İnformasiya Mərkəzi arasında birgə əməkdaşlığa dair anlaşma memorandumu imzalanıb. Sənədi Mingəçevir Turizm Kollecinin direktoru Kamal Əhmədov və Gəncə Regional Turizm İnformasiya Mərkəzinin direktoru Zaur Bayramov imzalayıblar.

Görüş əsnasında Mingəçevir Turizm Kollecinin direktoru Kamal Əhmədov imzalanmış memorandumun turizm və təhsil sahəsində geniş istiqamətləri əhatə edəcəyini, peşəkar mütəxəssislərin yetişdirilməsində kollec-sənaye əməkdaşlığının əhəmiyyətini ətraflı şəkildə vurğulayıb.

Eyni zamanda Gəncə Regional Turizm İnformasiya Mərkəzinin direktoru Zaur Bayramov  Mingəçevir Turizm Kolleci ilə imzalanan memorandumun hər iki qurum üçün faydalı olacağına əminliyini bildirib.

Memorandumda MTK tələbələrinin Mərkəzdə könüllü və istehsalat təcrübəsi üzrə müxtəlif proqramlarda iştirakı, tələbə və məzunlar üçün iş imkanlarının yaradılması, kollecdə təşkil olunan müxtəlif tədbirlərə Mərkəzin əməkdaşlarının dəvət olunması, layihə və tədqiqatların həyata keçirilməsində birgə iştirak, konfransların, təlimlərin, ustad dərslərinin, seminarların təşkili, ictimai əhəmiyyət kəsb edən təşəbbüslərin dəstəklənməsi və digər məsələlər əksini tapıb.

#mingəçevirturizmkolleci #azərbaycanturizmagentliyi #mtk #tələbə #karyera #memorandum #gəncə #əməkdaşlıq