Türkiyə Respublikasında istehsalat təcrübəsini uğurla başa vuran tələbələrlə kollec rəhbərliyi arasında görüş keçirilib. Görüşdə kollecin direktoru Kamal Əhmədov tələbələrlə səmimi müzakirələr apararaq onların təcrübə müddətində qazandıqları bilik və bacarıqlar barədə ətraflı məlumat əldə edib. Direktor çıxışında bildirib ki, beynəlxalq əməkdaşlıq çərçivəsində tələbələrin xarici ölkələrdə təcrübə keçməsi onların peşəkar inkişafına mühüm töhfə verir. O, Türkiyədə keçirilən təcrübənin turizm sahəsində müasir yanaşmaların öyrənilməsi, xidmət standartlarının mənimsənilməsi və praktiki bacarıqların təkmilləşdirilməsi baxımından xüsusi əhəmiyyət daşıdığını vurğulayıb. Görüş zamanı tələbələr təcrübə müddətində əldə etdikləri biliklər, qarşılaşdıqları yeniliklər və gördükləri iş prosesi barədə təəssüratlarını bölüşüblər. Onlar bu təcrübənin peşəkar inkişaflarında mühüm rol oynadığını qeyd edərək, yaradılan şərait və göstərilən dəstəyə görə kollec rəhbərliyinə təşəkkürlərini bildiriblər. Sonda direktor tələbələrə gələcək fəaliyyətlərində uğurlar arzulayıb, belə beynəlxalq layihələrin davamlı olacağını diqqətə çatdırıb.