Xalqımızın əziz bayramı olan Novruz yurdumuza qədəm qoyur. Bu münasibət ilə Mingəçevir Turizm Kollecinin kollektivi milli əlamətdar təqvimlərin bəzəyi hesab edilən İlaxır çərşənbəsi (torpaq) və Novruz bayramını  böyük coşqu ilə qeyd edib. Milli  rəmzi xüsusiyyətlər  və  Novruz elementləri  ilə tərtib edilmiş kollec meydanında bir araya gələn tələbə, müəllim və digər inzibati heyət üzvləri saatlar ərzində bayram tonqalı ətrafında unudulmaz anlar yaşayaraq bayramın keyfini çıxarıb. Şux rəqslər, milli və müasir musiqilər, poetik nümunələr, Novruz inancları ilə bağlı səhnəciklər, Novruzun rəmzləri olan Keçəl, Kosa, Bahar qız və Qorqud atanın bayram təbrikləri şənliyin ovqatını yüksəldərək  tədbirdə əsl bayram coşqusu yaradıb.

Kollektivi və  tədbir iştirakçılarını Novruz bayramı münasibətilə təbrik edən kollecin direktoru Kamal Əhmədov ən xoş arzularını paylaşıb. O, Vətən müharibəsində şanlı Qələbəmiz nəticəsində Novruz bayramının artıq ölkəmizin hər bir guşəsində qeyd olunmasından, işğaldan azad edilmiş torpaqlarımızda tarixi-mədəni irsimizin və adət-ənənələrimizin bərpa edilməsindən və doğma Qarabağımızda yandırılan bayram tonqallarından danışıb və Novruz bayramının xalqımızın mədəniyyətini, milli-mənəvi dəyərlərini özündə əks etdirən, dünyaya tanıtdıran qədim el bayramı olduğunu bildirib. Qeyd edib ki, Novruz qədər zəngin ənənəyə malik ikinci bir bayram təsəvvür etmək çətindir.
Nəhayət Qorqud atanın müşayəti ilə kollecimizin direktoru  Novruz tonqalını alovlandırıb. Kollektiv əl-ələ və çiyin-çiyinə bayram tonqalı ətrafında Yallı gedərək Novruzun həm də milli birlik rəmzi olduğunu qürurla nümayiş etdirib.