Mingəçevir Turizm Kollecində Novruz Bayramı və İlaxır çərşənbə münasibətilə milli-mənəvi dəyərlərin təbliği və yaşadılması, Novruz bayramının mədəni irs nümunəsi kimi gənc nəslə çatdırılması məqsədilə bayram tədbiri keçirilib. Tədbirdə kollecin qonaqları qismində “Üçüncü Bahar” İctimai Birliyi Mingəçevir Yaşa Mərkəzinin üzvləri iştirak etməklə yanaşı eyni zamanda proqramın bədii və təşkilati hissələrində də fəallıq nümayiş etdiriblər.

Tədbir Azərbaycan xalqının Ümummilli Lideri Heydər Əliyevin və Vətən uğrunda canlarını fəda etmiş şəhidlərin əziz xatirəsinin bir dəqiqəlik sükutla yad olunması ilə başlanıb, daha sonra Azərbaycan Respublikasının Dövlət Himni səsləndirilib.

Tədbirin açılışında çıxış edən kollecin direktoru Kamal Əhmədov Novruz bayramının xalqımızın əsrlərdən bəri yaşatdığı zəngin milli-mənəvi irsin ayrılmaz tərkib hissəsi olduğunu vurğulayıb. O bildirib ki, Novruz yalnız təbiətin oyanışını deyil, həm də xalqımızın birlik, bərabərlik, mərhəmət və həmrəylik kimi ali dəyərlərini özündə ehtiva edir. Direktor qeyd edib ki, bu gün Novruzun işğaldan azad olunmuş torpaqlarımızda da böyük qürur və sevinc hissi ilə qeyd olunması bayramın mənəvi dəyərini daha da artırır. Kamal Əhmədov tədbir iştirakçılarını Novruz və qarşıdan gələn Ramazan bayramı münasibətilə təbrik edib.

Daha sonra Yaşa Mərkəzin rəhbəri Validə Əlizadə çıxış edərək Novruz bayramının cəmiyyətimizdə milli kimliyin, birlik ruhunun və mənəvi bağlılığın güclənməsində mühüm rol oynadığını diqqətə çatdırıb. O, xüsusilə gənclərin bu dəyərlərin qorunması, təbliği və gələcək nəsillərə ötürülməsi istiqamətində fəal iştirakının vacibliyini vurğulayıb.

Tədbirin bədii hissəsi Novruz adət-ənənələrinin, xalq folklorunun və milli mədəniyyət nümunələrinin təqdimatı ilə yadda qalıb. Proqram çərçivəsində Kosa, Keçəl, Bahar qızı və Dədə Qorqud kimi simvolik obrazlar bayram ab-havasını daha da zənginləşdirib. Tələbələr və Mingəçevir Yaşa Mərkəzinin üzvlərinin birgə hazırladıqları səhnə-kompozisiya, ifa olunan haqqıştalar, mahnılar, milli rəqslər və səhnəciklər Novruzun zəngin mədəni irsini əyani şəkildə nümayiş etdirib. Tədbirin sonunda Novruz ənənəsinə uyğun olaraq tonqal alovlandırılıb. Tonqal kollecin əməkdaşı, şəhid leytenant Kənan Abdullayevin anası Azadə xanım və Yaşa Mərkəzin rəhbəri Validə xanım tərəfindən yandırılıb.