Mingəçevir Turizm Kollecində “Milli dövlətçiliyin möhkəmlənməsi: Azərbaycançılıq ideologiyası və mənəvi dəyərlərimiz” mövzusunda seminar keçirilib.
İyunun 2-də Dini Qurumlarla İş üzrə Dövlət Komitəsinin (DQİDK) Yevlax bölgəsi üzrə şöbəsinin və Mingəçevir Turizm Kollecinin birgə təşkilatçılığı ilə Mingəçevir Turizm Kollecində “Milli dövlətçiliyin möhkəmlənməsi: Azərbaycançılıq ideologiyası və mənəvi dəyərlərimiz” mövzusunda seminar keçirilib.
Tədbirdə DQİDK-nın Yevlax bölgəsi üzrə şöbəsinin əməkdaşı Əlisa Fərəcov, Mingəçevir Turizm Kollecinin mədəni-kütləvi tədbirlər üzrə təşkilatçısı Şahlar Mirzəliyev, kollecin müəllim və tələbələri iştirak ediblər.
Tədbirdə Azərbaycanın ən yeni tarixində milli-mənəvi dəyərlərimizin qorunması və inkişafı prinsiplərinin banisi kimi Ümummilli lider Heydər Əliyevin misilsiz xidmətlərinin olduğu vurğulanıb. Həmçinin xalqımızın milli-mənəvi dəyərlərini qorumaq və inkişaf etdirmək, eyni zamanda, müasir dünyanın elmi-texniki tərəqqisi ilə ayaqlaşa bilən, mənəvi köklərinə bağlı gənc nəslin yetişdirilməsinə, hüquqi, dünyəvi, demokratik və unitar dövlət sisteminə zəmin yaradan, dövlətlə vətəndaşların mənafeyini üzvi şəkildə birləşdirən Azərbaycançılıq ideologiyasının ölkədə vətəndaş birliyi və vahid cəmiyyət üçün uğurlu bünövrə olduğu diqqətə çatdırılıb. Çıxışçılar milli bayram və mərasimlərdə qədim mədəniyyətimizin, xalqımızın əsrlər boyu yaratdığı milli adət və ənənələrin, bədii sərvətlərin, tarixi hadisələrin əks olunduğunu və Müstəqillik Günü, Qurtuluş Günü və s. kimi əlamətdar günlər münasibətilə kollecdə keçirilən mədəni-kütləvi tədbirlərin gənc nəslin milli ruhda böyüməsinə, milli-mənəvi dəyərlərimizin gələcək nəsillərə ötürülməsində mühüm rol oynadığını nəzərə çatdırıblar.
