Mingəçevir Turizm Kollecində 29 aprel 2025-ci il tarixində “Əhalinin fövqəladə hallar zamanı mühafizəsinin təşkili” mövzusunda nümunəvi dərs təşkil olunub. Nümunəvi dərsdə Azərbaycan Respublikası Fövqəladə Hallar Nazirliyinin Aran Regional Mərkəzinin nümayəndələri iştirak edib.

Tədbiri giriş sözü ilə açan kollecin direktoru Kamal Əhmədov çıxış edərək bildirib ki, Fövqəladə Hallar Nazirliyi (FHN) Azərbaycanda fövqəladə halların qarşısının alınması, bu hallara hazır olmaq, operativ reaksiya vermək və nəticələrini aradan qaldırmaq üçün geniş vəzifələr dairəsini əhatə edir.

Daha sonra Aran Regional Mərkəzinin Mülki Müdafiə İdarəsinin Mülki müdafiəyə hazırlıq şöbəsinin rəisi, kapitan Pərvin Məmmədov çıxış edərək qeyd edib ki, FHN-in yaradılmasının əsas səbəblərindən biri Azərbaycanın coğrafi mövqeyi və təbii fəlakətlərə məruz qalma riskinin yüksək olmasıdır. Pərvin Məmmədov onu da qeyd edib ki, zəlzələlər, daşqınlar, torpaq sürüşmələri və texnogen qəzalar kimi təhlükələr ölkənin müxtəlif bölgələrində hər zaman potensial təhlükə təşkil edir.

Ardınca Mülki müdafiə hazırlıq şöbəsinin rəis müavini, kapitan Nəriman Məmmədov çıxışında qeyd edib ki, FHN-in əsas məqsədi təbii və texnogen fəlakətlərə, fövqəladə hallara operativ reaksiya vermək və əhalinin təhlükəsizlik mədəniyyətini yüksəltməkdir.

Daha sonra Mingəçevir Turizm Kollecinin müəllimi Fikrət Talıbov çıxış edərək bildirib ki, əhali arasında təhlükəsizlik mədəniyyətinin formalaşdırılması və fövqəladə hallara düzgün reaksiya verə biləcək bilik və bacarıqların artırılması FHN-in prioritet istiqamətlərindən biridir.

Ardınca Mülki müdafiə tədbirlərinin planlaşdırılması şöbəsinin baş zabiti, baş leytenant Röyal Tağızadə “Təbii mənşəli fövqəladə hallar və texnogen mənşəli fövqəladə hallar” mövzusunda ətraflı məlumat verib.

Tədbirin sonunda tələbələrə mövzu ilə bağlı videoçarx nümayiş etdirilib.