Mingəçevir Turizm Kolleci və Mingəçevir Regional Turizm İdarəsinin birgə təşkilatçılığı ilə Ümummilli Lider Heydər Əliyevin 102- ci ildönümünə həsr olunmuş silsilə tədbirlər həyata keçirilib.Tədbirlər planı çərçivəsində idarənin və kollecin əməkdaşları Heydər Əliyev abidəsini ziyarət edib, abidə önünə qərənfillər düzüb, hörmət duruşu nümayiş etdiriblər. Tədbirlər Mingəçevir Turizm Kollecində davam etdirilib. Kollecdə təşkil olunmuş “Ulu Öndər Heydər Əliyevin Azərbaycan turizminin inkişafında rolu” mövzusunda dəyirmi masada ilk öncə Ulu Öndərin və vətənin bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilib və Azərbaycan Respublikasının Dövlət Himni səsləndirilib. Daha sonra Ulu Öndərin həyatına həsr olunmuş videoçarx nümayiş etdirilib. Dəyirmi masada çıxış edən Mingəçevir Turizm Kollecinin direktoru Kamal Əhmədov bildirib ki, Ümummilli lider Heydər Əliyev müstəqil Azərbaycan dövlətçiliyinin qurucusu və memarı kimi fəaliyyətə başladığı ilk gündən xalqımızın milli-mənəvi dəyərlərinə, adət-ənənələrinə xüsusi önəm vermiş və bu sahədə davamlı siyasət həyata keçirmişdir. Bu gün Azərbaycan turizminin əldə etdiyi nailiyyətlər, beynəlxalq müstəvidə tanınması və inkişaf perspektivləri məhz Ümummilli liderin strateji baxışları və uzaqgörən siyasətinin nəticəsidir.
Daha sonra çıxış edən Mingəçevir Regional Turizm idarəsinin rəisi Tural Kərimov bildirib ki, bu cür görüşlər gənclərin turizm sahəsində biliklərinin artırılması, dövlətin turizm siyasətinin daha dərindən mənimsənilməsi və regionların turizm potensialının tanıdılması baxımından önəmlidir. O vurğulayıb ki, turizm həm iqtisadi, həm də mədəni baxımdan ölkənin inkişafında mühüm rol oynayır və regionlarda bu sahənin inkişaf etdirilməsi prioritet məsələlərdən biridir.
Dəyirmi masa kollecin müəllimləri Nuridə Zülfüqarova, Aydın Rəhimov və Mingəçevir Regional Turizm İdarəsinin baş məsləhətçisi Samirin Xanlayevin çıxışları ilə davam edib.
Ümummilli liderin 102-ci ildönümünə həsr olunmuş tədbirlərin davamı olaraq kollecin həyətyanı sahəsində tədbir iştirakçılarının iştirakı ilə gül əkmə aksiyası keçirilib. Qızılgüllərin əkildiyi aksiya Ulu Öndər Heydər Əliyevin əziz xatirəsinə ehtiramın ifadəsi məqsədini daşıyıb.