Mingəçevir şəhərində Ümummilli lider Heydər Əliyevin anadan olmasının 101-ci ildönümü münasibətilə silsilə tədbirlər keçirilib. Tədbirlərdə Mingəçevir Turizm Kollecinin rəhbər, müəllim və tələbə heyəti xüsusi fəallıq nümayiş etdirib. İlk olaraq kollecin kollektivi Şəhər stadionunda təşkil olunmuş tədbirdə iştirak edib. Şəhər tədbirində Mərkəzi Aran Regional Gənclər və İdman İdarəsinin təşkilatçılığı ilə “Ümummilli lider Heydər Əliyevin 101-ci ildönümünə həsr edilmiş voleybol idman növü üzrə turnir” də üçüncü yeri tutduğuna görə Mingəçevir Turizm Kollecinin qızlardan ibarət voleybol komandası kubokla, Dama idman növü üzrə şəhər birinciliyində birinci yeri tutduğuna görə Kollecin tələbəsi Abbasova Fəxrəndə diplom və medalla təltif olunub.

Daha sonra kollecin direktoru iki nəfər müəllim və 20 nəfər tələbə heyəti ilə birlikdə ağacəkmə aksiyasında iştirak edib. Tədbirlər silsiləsi kollektivin Ümummilli lider Heydər Əliyevin abidəsini ziyarət etməsilə davam edib. Abidənin üzərinə gül dəstələri düzülüb və Ulu Öndərin əziz xatirəsi bir dəqiqəlik sükutla yad edilib. Tədbirlər kollektivin Dram Teatrda Ulu Öndərin 101-ci ildönümünə həsr olunmuş tamaşa və Heydər Əliyev meydanında təşkil olunmuş konsert proqramında iştirakı ilə başa çatıb.

Mingəçevir Turizm Kollecində 10 May tarixində bütün qruplarda ilk dərslərdə Ulu Öndərin əziz xatirəsi bir dəqiqəlik sükutla yad edilib, hər kəs üçün örnək olan həyat yolu və Dahi Şəxsiyyətin Azərbaycan xalqının həyatında əvəzsiz rolu tələbələrin diqqətinə bir daha çatdırılıb.

Ulu Öndər Siz Azərbaycan xalqının xatirəsində əbədi yaşayacaqsınız.