Mingəçevir Turizm Kolleci 501 tələbəsini məzun etdi.
2022-ci ilin 31 may tarixində M.Davudova adına Mingəçevir Şəhər Dram Teatrında Mingəçevir Turizm Kollecinin təşkilatçılığı ilə Məzun günü münasibətilə təntənəli tədbir keçirilib. Tədbir Azərbaycan Respublikasının Dövlət Himninin səsləndirilməsi və məzun tələbələrin səhnəyə çıxışı ilə başlayıb.
Tədbirdə 501 məzun tələbə və kollecin kollektivi, Mingəçevir Gənclər və İdman İdarəsinin direktoru Kamal Nəcəfli, “Mingəçevir Gənclər Evi” Sosial Xidmət Müəsisəsinin direktoru Tural Kərimov, “Ağ Saray Delux Otel”-in direktoru Kənan Hənifəyev, “Kür Olimpia Tədris İdman Mərkəzi”-in direktoru Ceyhun Mirzəyev, “İşıqlı Gələcək Gənclər İctimai Birliyi”-nin sədri Samrin Xanlayev, ictimaiyyət və media nümayəndələri, şəhid anaları və valideynlər iştirak edib.
Tədbiri giriş sözü ilə açan Mingəçevir Turizm Kollecinin direktoru Kamal Əhmədov tədbir iştirakçılarını salamlayıb, məzun günü münasibətilə ən xoş arzularını çatdırıb. K.Əhmədov tədbir iştirakçılarını birinci Qarabağ müharibəsi, Aprel döyüşləri, İyul döyüşləri, ikinci Qarabağ müharibəsi və 30 illik işğal dövründə qəhrəmanlıq zirvəsinə ucalan şəhidlərimizin əziz xatirəsini bir dəqiqəlik sükutla yad etməyə dəvət edib. Bu qələbənin banisi olub, əzəli torpaqlarımızın azad olunması yolunda canından keçən şəhidlərə Allahdan rəhmət diləyib, qazi əsgər və zabitlərimizə şəfa arzulayıb. O öz çıxışında vurğulayıb ki, Ulu Öndər Heydər Əliyevin siyasətini uğurla davam etdirən Ali Baş Komandanımızın və rəşadətli Azərbaycan əsgərinin sayəsində bugün Qarabağ inkişaf edir, çiçəklənir. Mingəçevir Turizm Kolleci isə öz missiyasına uyğun olaraq turizm sahəsində kadr hazırlığını peşəkar səviyyədə həyata keçirərək bu inkişafa öz töhvəsini verir. Həmçinin K.Əhmədov ölkə prezidenti cənab İlham Əliyev tərəfindən qeyri-neft sektoruna aid olan turizmin inkişafı məqsədilə atılan addımları qeyd edərək bu sahənin ölkə səviyyəsində inkişafının prioritet məsələ olduğunu nəzərə çatdırıbdır. Kollecin öz missiyasını həyata keçirmək üçün göstərdiyi qayğıya görə Azərbaycan Respublikası Dövlət Turizm Agentliyinin sədri cənab Fuad Nağıyevə öz təşəkkürünü bildirib.
Daha sonra Mingəçevir Gənclər və İdman İdarəsinin direktoru Kamal Nəcəfli öz çıxışında məzun günü münasibətilə tələbələri təbrik edib və kollecin yarandığı gündən etibarən fəaliyyəti dövründə gəncliyə, gələcəyə və idmana verdiyi töhvənin əhəmiyyətini qeyd edib.
Həmçinin Tədrisdə Keyfiyyətin Təminatı şöbəsinin müdiri Samirə Abbasova məzun tələbələrə uğurlar arzulayıb və onların gələcək üçün potensiallı kadr kimi formalaşmasında kollec təhsilinin rolunu vurğulayıb, bu uğurun gələcəkdə də davam etməsini arzu edib.
Bundan sonra kollecin ədəbiyyat müəllimi Kifayət Əliyeva məzun tələbələri təbrik etmək üçün dahi şair Bəxtiyar Vəhabzadənin şeirini səsləndirib. Ardından söz şəhid analarına verilib və onlar kollec rəhbərliyinin şəhid ailələrinə olan qayğısından məmnunluqlarını ifadə edib, tələbələrə xoş arzularını çatdırıb.
Tədbirdə əsl bayram əhval-ruhiyyəsi hiss olunurdu. Məzun libasında olan tələbələr böyük sevinclə çıxış edib, hazırladıqları mahnıları oxuyub, şeirlər deyib, rəqs və musiqi alətində ifa ediblər.
Sonda kollecin direktoru Kamal Əhmədov tərəfindən səhnədə təhsil aldığı müddət ərzində kollecin sosial-ictimai həyatında aktiv rolu olan, ölkə tədbirləri və yarışlarda yer qazanan 20 tələbə və kollecin kollektivindən 5 nəfər fəxri fərmanla təltif olunub.
Direktor və müəllim kollektivi ilə şəkillər çəkilərək yekunlaşan tədbir rəngarəng və səmimi anlarla yadda qalıb. Bir daha Mingəçevir Turizm Kolleci adından bütün məzunlarımıza uğurlar arzulayırıq!