26 sentyabr 2024-cü il tarixində Mingəçevir Turizm Kollecində Mərkəzi Aran Regional Gənclər və İdman İdarəsinin 27 sentyabr “Anım Günü” nə həsr olunmuş birgə tədbiri keçirilib.

Tədbirdə ilk öncə Azərbayacan torpaqlarının ərazi bütövlüyü və suverenliyi uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

“Yenilməz ordumuzun unudulmaz, tarixi hesabı” adlı tədbirdə giriş sözü ilə Mərkəzi Aran Regional Gənclər və İdman İdarəsinin rəisi Azad Gözəlov çıxış edib. Azad Gözəlov çıxışında Mingəçevir Turizm Kollecinin hərbi vətənpərvərlik mövzusunda keçirilən tədbirlərin təşkilinə xüsusi həssaslıqla yanaşdığını və bu istiqamətdə qarşılıqlı əməkdaşlığı xüsusi vurğulayıb . Üzünü gənclərə tutaraq, 27 sentyabr “Anım günü” nün gənclərin vətənpərvər ruhda formalaşdırılmasında vacib rolu haqqında danışıb.

Çıxışdan sonra Vətən müharibəsinə həsr olunmuş videoçarx nümayiş etdirilib.

Daha sonra tədbir kollecin direktoru Kamal Əhmədovun çıxışı ilə davam edib. Çıxışında 27 sentyabr tarixinin önəmi haqqında danışan Kamal Əhmədov bu günün Azərbaycan xalqının müzəffər tarixinin yazıldığı gün kimi hərb tariximizə qızıl hərflərlə yazıldığını bildirib. İşğal altında olan torpaqlarımızın qəhrəman şəhidlərimizin, əsgər və zabitlərimizin, qazilərimizin qanı və canı bahasına azad olunduğunu bildirib. Kamal Əhmədov çıxışının sonunda tələbələrə vətənpərvər ruhda yetişməyi, ölkəmizə layiqli vətəndaş olmağı tövsiyə edib. Bu istiqamətdə şəhid və qazilərimizin həyat yolunun gənclərin əsl vətəndaş kimi yetişməsində bir məktəb olduğunu qeyd edib.

Tədbirdə Vətən müharibəsi iştirakçısı, ehtiyatda olan mayor Pərviz Məmmədov 2-ci Qarabağ müharibəsi ilə bağlı xatirələrini paylaşıb. General Polad Həşimovun qərargah rəisi olduğunu və onunla yanaşı digər yoldaşlarının da şəhadətə ucaldıqlarını vurğulayıb . Həmçinin Azərbaycan xalqının dəmir yumruq kimi bir olduğunu , həmrəy olduğunu söyləyib.

Tədbirdə Kollecin tələbələri Vətən müharibəsinin onların yaddaşında və xatirələrində buraxdığı izləri, müharibə zamanı yaşadıqlarını tədbir iştirakçıları ilə paylaşıblar .